ЦХИНВАЛ, 26 янв – Sputnik. Дзæуджыхъæуы майрæмбоны ацæудзæн Æппæтуæрæсейаг патриотикон рухстауæн акци "Трамвай памяти", кæцы нывонд у Ленинграды блокадæ сисыны 80 азы юбилейæн. Уый тыххæй хъусын кæны 15-æм Регион.
Мадзал райдайдзæн Сабырады проспектыл Хетæгкаты Къостайы номыл культурæ æмæ улæфты Централон паркы бахизæны цур. Скъоладзаутæн ауадздзысты лекци, кæцыйы фæлгæтты радзурдзысты блокадон Ленинграды цæрджытæ æмæ ветерантæ-блокадникты тыххæй Цæгат Ирыстонæй, афтæ ма горæт-хъайтары символты тыххæй.
Æппæтуæрæсейаг патриотикон рухстауæн акци "Трамвай памяти" райдайдзæн Санкт-Петербурджы. Цæгат Ирыстонæй дарддæр дзы хайад исынц Краснодары край, Омск, Ульяновск æмæ Свердловскы областтæ.