ЦХИНВАЛ, 2 фев – Sputnik. Хуссар Ирыстонмæ Уæрæсейы дарынц иттæг позитивон ахаст æмæ æмбарынц, республикæ кæй æххæст кæны хæслæвæрдтæ уæззау уавæрты, уый тыххæй президент Гаглойты Аланимæ фембæлды рæстæджы фехъусын кодта УФ президенты æхсæнрегионалон æмæ культурон бастдзинæдты фæдыл дæлхайады хистæр Игорь Маслов.
Уæрæсейаг делегаци æрцыд Хуссар Ирыстонмæ дыууæбонон балцы. Изæры уазджыты райста президент, хъусын кæны йæ пресс-службæ.
Гаглойты Алан раарфæ кодта уазджытæн æмæ сын бузныг загъта цæстдарды тыххæй Хуссар Ирыстоны проблемæтæм, сæйраджыдæр, финансон фæрæзтæ фæстæмæ æрыздахын æмæ таможнæйон хъалон аивыны тыххæй.
"Махæн уый у тынг ахсджиаг", - загъта Гаглойты Алан.
Президент банысан кодта, ацы аз кæй уыдзысты ахсджиаг политикон цаутæ – Уæрæсейы президенты æвзæрстытæ, Хуссар Ирыстоны парламентмæ æвзæрстытæ, афтæ ма Инвестицион программæйы реализаци.
Игорь Маслов йæхирдыгæй бахахх кодта, кæд цыбыр рæстæгмæ æрцыдысты балцы, уæддæр нывæндынц æрныхас кæнын æппæт фарстытыл.
"Мах стæм иудадзыг контакты уæрæсейаг минæварадимæ æмæ зонгæ стæм уæ проблемæтимæ. Цæй кой скодтад, уый та уыдаид техникон фиппаинæгтæ сраст кæнын. Глобалон проблемæтæ скъуыддзаг куы цæуынц, уæд аивæрзынц цæстдарды бынæй кæцыдæр нюанстæ", - загъта Маслов.
Афтæ ма уый бахахх кодта, зæгъгæ, Мæскуы, хицауад, президенты администраци æмæ Уæлдæр Командæгæнæгмæ ис иттæг позитивон ахаст республикæмæ.