ЦХИНВАЛ, 28 фев - Sputnik. Цæгат Ирыстоны райдыдтой дæттын цæрæнуатон сертификаттæ æвзонг бинонтæн, ацы аз ног фатерты хицæуттæ бауыдзысты 124 бинонтæ, фехъусын кодта æртыццæджы республикæйы сæргълæууæг Сергей Меняйло.
"Ацы къуыри цæрæнуатон субсидитæ дæттынц республикæйы алы районы дæр", - ныффыста Меняйло йæ Telegram-каналы.
Æвзонг бинонтæн фадат ис фæхуыздæр кæнын сæ цæрæнуатон уавæртæ Цæгат Ирыстоны хайадисты фæрцы паддзахадон программæйы, банысан кодта республикæйы сæргълæууæг.
"Ацы системæ кусы афтæ: паддзахад фиды фатеры аргъы хай бинонты бæсты, фæрæзтæ та дæттынц субсидиты хуызы. Æвзонг бинонтæн æнæ сабитæй фидынц цæрæнуаты аргъы 30%, сывæллонджын бинонтæн та – 35%", - бахахх кодта Меняйло.
Республикæйы разамонæг зæрдæбынæй раарфæ кодта сертификатты хицæуттæн.