Хуссарирыстойнаг командæ "Хуссар" ссис æппæтуæрæсейаг турниры призер футболæй Сочийы

ЦХИНВАЛ, 22 апр – Sputnik, Дзæгъиаты Олег. Командæ "Хуссар" Хуссар Ирыстонæй бацахста дыккаг бынат æппæтуæрæсейаг хæдахуыр футболон турниры "Лига Ставок Sochi Cup II"-ы, кæцы цыд Сочийы.

"Хуссар" ацыд фæстаг бынатыл йæ къорды, фæлæ уæлæмхасæн бæрæггæнæнтæм гæсгæ йын бантыст ахизын плей-оффмæ категори FEST-ы. Плей-оффы командæ йæхи равдыста бирæ хуыздæр. Финалы 1/4 æмæ 1/2 хайы хуссарирыстойнаг футболисттæ рамбылдтой командæтæ "Dom" (Адлер) æмæ "Волна" (Геленджик) 3:1 æмæ 3:0 хыгъдтæй.

Финалон хъазты "Хуссар" 3:1 хыгъдæй æмбылдта командæ "Broadvape"-ы Омскæй, фæлæ фæстаг минуттыл бауагътой дыууæ голы æмæ хъазт ахызт пенальтиты серимæ, цы ран æнтыстджындæр разынд Омскы командæ.