ЦХИНВАЛ, 2 май - Sputnik, Плиты Фатимӕ. Хуссар Ирыстоны фӕндагарӕзтады комитет республикӕйы столицӕйы баивдзӕн сӕдӕйы бӕрц зӕронд люктӕ, кӕцытӕ ӕвзӕрын кӕнынц фӕндӕгтыл аварион уавӕртӕ. Уый тыххӕй Sputnik-ӕн радзырдта комитеты хистӕр Гӕбӕраты Алан.
Ныр цалдӕр къуырийв дӕргъы Цхинвалы централон уынгтыл цӕуынц куыстытӕ. Рӕстӕгмӕ фӕндагон нысӕнттӕ, кӕцытӕ фӕдзӕхсынц шофыры, фенӕн уыд ацы бонты Хъайтарты, Сталины, 8 июны ӕмӕ ӕндӕр централон уынгтыл.
"Ивд цӕуынц горӕты ӕппӕт проблемон люктӕ, сӕ нымӕц у 96. Уыдонӕн шофыртӕ скъӕрдтой сӕ иувӕрсты, уый ӕвзӕрын кодта аварион уавӕртӕ", - загъта Гӕбӕраты Алан.
Уый ма бафиппайдта, ацы куыстыты фӕстӕ та аразджытӕ райдайдзысты Цхинвалы уынгтыл дзыхъхъытӕ асфальт кӕнын.