Цхинвалы банысан кодтой Славяйнаг фыссынад æмæ культурæйы бон

ЦХИНВАЛ, 24 май - Sputnik, Томайты Аманда. Цхинвалы майрæмбоны банысан кодтой Славяйнаг фыссынад æмæ культурæйы бон. Уый фæдыл уырыссаг æвзаг æмæ литературæйы ахуыргæнджыты Ассоциаци бацæттæ кодта къорд мадзæлттæ Хуссар Ирыстоны паддзахадон университеты.

Славяйнаг фыссынад æмæ культурæйы бон æрвылаз нысан кæнынц 24 майы Уæрæсейы, афтæ ма æввахс фæсарæнты бæстæты.

Уырыссаг æвзаг æмæ литературæйы ахуыргæнджыты Ассоциаци бацæттæ кодта литературон-музыкалон равдыст æмæ зонадон-практикон конференци. Мадзалы рæстæджы ралæууыдысты æхсæзæм астæуккаг скъола æмæ гимнази "Альбион"-ы ахуырдзаутæ, афтæ ма схорзæхджын кодтой ахуыргæнджыты, кæцытæ хайад истой конкурсты", - радзырдта Россотрудничествойы минæварады сæргълæууæг Хуссар Ирыстоны Сергей Комиссаров.

Зонадон-практикон конференцийы фæлгæтты байхъуыстой ХИПУ уырыссаг æвзаг, литературæ æмæ филологийы кафедрæйы ахуыргæнджытæ, профессортæ æмæ доцентты докладтæм.