ЦХИНВАЛ, 6 июн - Sputnik. Хуссар Ирыстон ӕмӕ Уӕрӕсейы Ульяновскы област бафыстой ӕмгуыстады фӕдыл бадзырд базарадон-экономикон, зонадон-техникон ӕмӕ культурон-гуманитарон къабӕзты, хъусын кӕны РХИ хицауады пресс-службӕ.
Церемони ацыд Петербурджы ӕхсӕнадӕмон экономикон форумы фӕлгӕтты, документ бафыстой Хуссар Ирыстоны хицауады сӕрдар Джуссойты Константин ӕмӕ Ульяновскы областы губернатор Алексей Русских.
"Ӕддагон бастдзинӕдтӕ ӕмӕ кусӕгон партнерон ахастыты райрӕзт у хицауады сӕйрагдӕр хӕслӕвӕрдтӕй иу, уый ахъаз фӕуыздзӕн республикӕйы потенциалы райрӕзтӕн, экономикон бӕрӕггӕнӕнты рӕзтӕн ӕмӕ инвесторты ӕрбаздахынӕн Хуссар Ирыстонмӕ. Мах нывӕндӕм среализаци кӕнын Ульяновскы областы хицауадимӕ пайдаджын проекттӕ агросӕудӕджерады, туризм ӕмӕ сӕудӕджерады къабазы. Уый ракӕндзӕн нӕ хӕларадон ахастытӕ ног ӕмвӕзадмӕ", - загъта Джуссойты Константин.