ЦХИНВАЛ, 27 июн – Sputnik, Дзæгъиаты Олег. Хуссар Ирыстоны Хъахъхъæнынады министрады Кадетон скъолайы ацыд "Мир – Мост – Осетия"-йы хæрзаудæн фонды премитæ радтыны бæрæгбонон церемони.
Цытджын мадзалы хайад райстой хъахъхъæнынады министры хæстæ æххæстгæнæг Сабанты Инал, скъолайы директор Баликъоты Фатимæ, фонды директор Тадтаты Таймураз æмæ ахуырдзауты ныййарджытæ. Мадзалы рæстæджы ахуырадон уагдоны дæс хуыздæр ахуырдзауы райстой иухаттон стипендитæ.
"Мир – Мост – Осетия" фонды директор Тадтаты Таймураз банысан кодта, фонд дыууæ азы дæргъы кæй æмгуыстад кæны Хуссар Ирыстоны Хъахъхъæнныады министрадимæ.
"Мах дарддæр нывæндæм уæрæх кæнын нæ æмгуыстад республикæйы хъахъхъæнынадон уагдонимæ æмæ алыварсон æххуыс кæнын Кадетон скъолайæн", - загъта Тадтаты Таймураз.
Йæ ныхæстæм гæсгæ, ног ахуырадон азы райдайæнæй Кадетон скъолайы æртæ хуыздæр ахуырдзауы æрвыл мæй исдзысты уæрæсейаг паддзахадон архайæг, инæлар-лейтенант Алексей Шишковы номыл стипенди.
Кадетон скъолайы директор Баликъоты Фатимæ раарфæ кодта стипенди райсæг ахуырдзаутæн æмæ бузныджы ныхæстæ загъта сæ ныййарджытæн.
Уый размæ "Мир – Мост – Осетия" фонды стипендитæ радтой ХИПУ-йы дæс хуыздæр студентæн.