ЦХИНВАЛ, 25 июл – Sputnik, Дзæгъиаты Олег. Цыппæрæмы ацæуæг оперативон æмбырды Хуссар Ирыстоны президент Гаглойты Алан Мидхъуыддæгты министрады къухдариуæггæнæг Гуыцмæзты Аланæн бахæс кодта "æбæрæг кусджыты" айсын.
"Милицийы сæрмагонд нысаниуæджы къордæй райдайгæйæ æмæ мидхъуыддæгты министрады æндæр дæлхæйттæй фæугæйæ, куыстмæ ахæм адæмы райстой, æмæ сæ уынгæ дæр ничи фæкодта. Ацы проблемæ алыг кæныны куыст райдыдтам, фæлæ йæ, мæнмæ гæсгæ, кæронмæ нæ ахæццæ кодтам", – банысан кодта президент.
Гаглойты Алан йæ ныхæстæм бафтыдта, зæгъгæ, "æбæрæг кусджытæ" ист куы `рцæуой, уæд министрады куыст суыдзæн эффективондæр.