ЦХИНВАЛ, 29 июл – Sputnik, Плиты Фатимӕ. Цхинвалы сывӕллӕтты сфӕлдыстады Галуаны базӕйыл боны уӕвынадимӕ лагерь райста улӕфджыты дыккаг поток. Уый тыххӕй Sputnik-ӕн радзырдта лагеры директор Харебаты Сюзанна.
Дыккаг потокы дӕр улӕфдзысты 80 сывӕллоны бӕрц Цхинвалы скъолатӕй. Ивгъуыд сменӕ фӕцис майрӕмбоны, сывӕллӕтты бабӕрӕг кодта президент Гаглойты Алан дӕр.
"Фыццаг ӕмӕ дыккаг сменӕйы сты иу кары сывӕллӕттӕ – уыдон сты райдиан скъолайы ахуырдзаутӕ, уый фӕдыл сын ис ӕмхуызон программӕ, националон здӕхтимӕ", - загъта Харебаты Сюзанна.
Лагеры программӕйы фӕлгӕтты сывӕллӕттӕм ӕнхъӕлмӕ кӕсынц цымыдисон балцытӕ ӕмӕ экскурситӕ Хуссар Ирыстоныл. Директоры ныхӕстӕм гӕсгӕ, лагеры кусджытӕ ӕмархайд кӕнынц Ӕвзонг техникты станц ӕмӕ Ӕвзонг натуралистты станцы коллективтимӕ, уый руаджы сывӕллӕттӕн ауадзынц мастер-класттӕ.
Цхинвалы сывӕллӕтты сфӕлдыстады Галуаны базӕйыл ӕдӕппӕт баулӕфдзысты ӕртӕ потокы.