ЦХИНВАЛ, 7 авг – Sputnik, Плиты Фатимӕ. Хуссар Ирыстоны Знауыры районы Арчънеты хъӕу сифтонг кӕндзысты нуазыны донӕй азы кӕронмӕ, фехъусын кодта Sputnik-ӕн районы цӕрӕнуатон-коммуналон хӕдзарады разамонӕг Джиоты Игорь.
"Цӕрӕнуатон-коммуналон хӕдзарады нывӕсты 2024 азмӕ ис куыстытӕ 700 метры дӕргъӕн нуазыны доны хахх ауадзыны фӕдыл", - загъта Джиоты Игорь.
ЦКХ разамонӕг бафтыдта, зӕгъгӕ, аналогион куыстытӕ ауадздзысты Бехъмары хъӕуы дӕр. Йӕ ныхӕстӕм гӕсгӕ, ацы дыууӕ хъӕуы фӕстӕ районы ЦКХ скъуыддзаг кӕндзӕн ноджы дыууӕ хъӕуы – Терегуан ӕмӕ Балтайы нуазыны донӕй сифтонг кӕныны фарст.