ЦХИНВАЛ, 7 авг – Sputnik. Цхинвалы Хуссар Ирыстоны паддзахадон университеты 8 августы байгом уыдзæн æфсæддон-политикон аналитик Ян Гагины фоторавдыст. 2008 азы августы хæстæн нывонд фоторавдысты бавдисдзысты къамтæ, документтæ æмæ æндæр æрмæджытæ.
"Равдысты мæ фæнды фенын кæнын, дыууæ хæст дæр – сæрмагонд æфсæддон операци æмæ августы хæст сты Америкæ æмæ сæ сателлитты прокси-хæстытæ. Дыууæ хæсты бындуры дæр ис æмхуызон автор æмæ æххæстгæнæг. Зиан та баййæфтой сабыр цæрджытæ, куыд 2008 азы, афтæ ныр дæр", - радзырдта Sputnik-æн Ян Гагин.
Ян Гагин йæхæдæг бакæндзæн равдыст æмæ ауадздзæн фембæлд фæсивæдимæ.
"Баныхасы форматы мæ бон фылдæр суыдзæн радзурын. Фæлæ къамты руаджы дæр алцыдæр уыдзæн æмбæрстгонд. Сæйраджыдæр, Хуссар Ирыстоны адæмæн, уыдон алцыдæр хъуыды кæнынц", - бафтыдта Ян Гагин.
Гуырдзыстойнаг ӕфсад райдыдта ӕххӕстмасштабон ӕрбабырст 2008 азы 8 августы æмбисæхсæвмæ æввахс. Цхинвалы æмæ горæты алыварс хъӕуты Гуырдзыстоны ӕфсад фӕкодта карз ӕхсты бын. Уый фæстæ Цхинвалмæ бабырстой танктæ æмæ гуырдзиаг тыхон структурæты равзаргæ хæйттæ. Республикӕйы столицӕйӕн ӕрхастӕуыд стыр зиан, фылдӕр кодта сабыр цӕрджыты ӕмӕ фидауынгӕнӕг тыхты ӕхсӕн амӕттӕгты нымӕц. Ацы трагикон уавӕры уӕрӕсейаг къухдариуӕгад аскъуыддзаг кодта тугкалд ӕрлӕууын кӕнын ӕмӕ Гуырдзыстоны тыхӕй сабырадмӕ ӕркӕныны операци райдайын. Уый кӕронмӕ бахӕццӕ 12 августы.