ЦХИНВАЛ, 13 авг – Sputnik, Дзӕгъиаты Олег. Фондз хуссарирыстойнаг спортсмены хайад райсдзысты Уӕрӕсейы чемпионаты уӕгъдибар хъӕбысхӕстӕй 24 азы кары ӕрыгӕтты ӕхсӕн. Турнир цӕудзӕн 14-ӕй 19-ӕм августмӕ Хъӕрӕсе-Черкесийы.
Турниры майдантыл 86 килограммы уӕзы категорийы стох кӕндзӕн Пӕррӕстаты Давид. Уӕрӕсейы чемпионатты ӕхсӕзӕм сыгъзӕрин майдан бафӕлвардзӕн рамбулын Дзӕгъиаты Сослан 97 килограммы уӕзы категорийы. Ацы категорийы ма тох кӕндзӕн Дзеранты Эрик дӕр. Хуссар Ирыстоны ноджы дыууӕ минӕвары, Бестауты Андрей ӕмӕ Алан, стох кӕндзысты 125 килограммы уӕзы категорийы.
Ерысты хайад райсдзысты 300-йӕ фылдӕр спортсмены бӕстӕйы алыгъуызон регионтӕй.