ЦХИНВАЛ, 16 авг - Sputnik, Томайты Аманда. Хуссар Ирыстоны паддзахадон ансамбль "Симд"-ы кæстæр къорд хайад райсдзæн III Æхсæнадæмон культурон форумы сывæллæттæн Мæскуыйы. Уый тыххæй Sputnik-æн фехъусын кодта ансамблы аивадон разамонæг Коцты Сергей.
"Мах бадæттам куырдиат хайад райсыны фæдыл, нæ видеомæ нын бакастысты, æмæ райстам хорз нысан. Афтæ ма нын нæ ралæуд равзæрстой форумы гала-концертæн дæр. Форум цæудзæн 22-æй 24-æм августмæ, нæ республикæйæ дзы ацæудзæн ансамблы кæстæр къорд æхсæз адæймаджы скондæй. Сывæллæттæ сты хорз цæттæ. Мах сæрыстырæй равдисдзыстæм ирон культурæ", - загъта Коцты Сергей.
Йæ ныхæстæм гæсгæ, Мæскуымæ балц сорганизаци кæнынæн баххуыс кодтой Хуссар Ирыстон æмæ Уæрæсейы культурæйы министрæдтæ.
Хуссарирыстойнаг ансамблæй дарддæр форумы уазджытæ уыдзысты Инди, Египет, Серби, Белорусси, Абхаз, Китай, Бразили, Днестыргæрон, Сири, Туркменистан, Узбекистан, Иордани æмæ Ливийы минæвæрттæ.