ЦХИНВАЛ, 28 авг - Sputnik, Томайты Аманда. Уырыссаг хӕдзар Цхинвалы ратдзӕн чингуытӕ Хуссар Ирыстоны скъолатӕн. Акци уагъд цӕуы фӕсарӕнты скъолаты ахуырадӕн ӕххуысы фӕдыл уӕрӕсейаг программӕйы фӕлгӕтты, фехъусын кодта Sputnik-ӕн организацийы сӕргълӕууӕг Сергей Комиссаров.
"Хуссар Ирыстоны ахуырады министрадимӕ бадзырдмӕ гӕсгӕ абон радтам чингуытӕ ӕмӕ аивадон литературӕйы 7,5 мин экземпляры скъолатӕн. Мах ӕрвылаз уадзӕм ахӕм акцитӕ бирӕ рӕстӕджы дӕргъы", - загъта Комиссаров.
Йӕ ныхӕстӕм гӕсгӕ, чингуытӕ равзарынц ахуырадон уагдӕтты куырдиттӕм гӕсгӕ.
Сергей Комиссаров ма бафтыдта, зӕгъгӕ, скъолатӕн чингуытӕ ног ахуырадон азмӕ байуардзӕн республикӕйы ахуырады министрад.