ЦХИНВАЛ, 26 сен – Sputnik, Дзӕгъиаты Олег. Ирон дзюдоисттӕ Коцойты Аслан, Кадзаты Арсен ӕмӕ Зӕгъойты Дзерассӕ хайад райсдзысты дунейы чемпионаты дзюдойӕ 21 азы онг кары ӕрыгӕтты ӕхсӕн Душанбейы.
Коцойты Аслан мӕйы размӕ рамбылдта ӕвзист майдан Европӕйы чемпионаты 21 азы кары онг ӕрыгӕтты ӕхсӕн, ныр та стох кӕндзӕн дунейы чемпионаты 90 килограммы уӕзы категорийы. Турниры спортсмен архайдзӕн Азербайджаны командӕйы сконды.
Уӕрӕсейы ивгъуыд азы чемпионаты ӕвзист призер Кадзаты Арсен та тох кӕндзӕн турниры майдантыл 100 килограммы уӕзы категорийы. Уӕрӕсейы ныры чемпионкӕ дзюдойӕ Зӕгъойты Дзерассӕ та архайдзӕн 63 килограммы уӕзы категорийы. Дыууӕ дзюдоисты дӕр дунейы чемпионаты хъахъхъӕндзысты Уӕрӕсейы спортивон кад.
Дунейы чемпионат дзюдойӕ 21 азы онг кары спортсменты ӕхсӕн цӕудзӕн Душанбейы 2-5 октябры. Турниры хайад райсдзысты 500 спортсмены бӕрц 68 бӕстӕйӕ. Уӕрӕсейаг дзюдоисттӕ хайад райсдзысты турниры нейтралон тырысайы бын.