ЦХИНВАЛ, 13 окт – Sputnik, Дзæгъиаты Олег. Ирон спортсментæ Бекъойты Артур æмæ Уалыты Вильям систы Къудухты Бесикы номарæн турниры уæлахиздзаутæ. Уæгъдибар хъæбысхæстæй æппæтуæрæсейаг ерыстæ ацыдысты Краснодары.
Бекъойты Артур пьедесталы бæрзонддæр къæпхæнмæ схызт 92 кг уæзы категорийы. Кæронбæттæны фæуæлахиз дагестайнаг хъæбысæйхæцæг Омаров Шарафудиныл. Уалыты Вильям та финалы рахæцыд нæ иннæ æмбæстаг Гаглойты Иналимæ. Вильям разынд тыхджындæр æмæ райста сыгъзæрин хорзæх, Иналы къухы та бафтыд æвзист. Уымæй дарддæр, дыккаг бынат бацахста Бекъойты Давид.
Бронзæ хорзæхтæ рамбылдтой Уаниты Давид, Золойты Борис, Абайты Георги æмæ Санахъоты Родион.
Ерыстæ цыдысты 11-13 октябры. Бацархайдтой дзы, 21 азы онг кæуыл цæуы, ахæм спортсментæ.