ЦХИНВАЛ, 1 ноя – Sputnik. Свердловскы област фӕнд кӕны дарддӕр уӕрӕх кӕнын ӕмгуыстад Хуссар Ирыстонимӕ, фехъусын кодта Sputnik-ӕн Свердловскы областы губернаторы хӕдивӕг Дмитрий Ионин.
Йӕ ныхӕстӕм гӕсгӕ, Свердловскы област ӕмӕ Хуссар Ирыстоны ӕхсӕн ӕмгуыстады фӕдыл бадзырд бафыстӕуыд Санкт-Петербурджы экономикон форумы фӕлгӕтты 2023 азы.
"Мах райгонд стӕм, ӕмгуыстад кӕй рахызт практикон тыгъдадмӕ. Нӕ коллегӕтӕ Хуссар Ирыстонӕй ӕрцыдысты хӕлцадон равдыст "InterFood Ural"-мӕ стыр стендимӕ. Хуссар Ирыстонӕн ис бирӕ равдисинаг. Махӕн та нӕ хӕс у баххуыс кӕнын хуссарирыстойнаг коллегӕтӕн равдысты фӕлгӕтты бафыссын контракттӕ нӕ базарадон хызӕгтимӕ", - банысан кодта Ионин.
Свердловскы областы губернаторы хӕдивӕг Дмитрий Ионин.
© Sputnik / Павел Лисицын
Йӕ ныхӕстӕм гӕсгӕ, равдысты Хуссар Ирыстоны стенд уыд иууыл хуыздӕрты рӕнхъы.
Ионин бафтыдта, зӕгъгӕ, равдысты кӕрон Свердловскы област ӕмӕ Хуссар Ирыстонӕн фадат уыдзӕн бафыссын бадзырдтӕ, цӕмӕй республикӕйы цӕрджытӕ базонгӕ уой уӕрӕсейаг регионы продукциимӕ.