ЦХИНВАЛ, 11 ноя - Sputnik, Плиты Фатимæ. Чемпионаттæ æмæ æхсæнадæмон турнирты бирæ хатты уæлахиздзау Михаил Логачев рамбылдта Уæрæсейы Адæмон иудзинады бонæн нывонд ерыстæ шахматтæй Цхинвалы. Уый тыххæй Sputnik-æн фехъусын кодта Хуссар Ирыстоны шахматты федерацийы сæргълæууæг Саулохты Георгий.
Ерыстæ фесты знон изæр республикæйы столицæйы.
"Турниры сæйраг сенсаци уыд æвзист майданы хицау Æлборты Владислав. Уый у Цхинвалы Россотрудничествойы минæварады кусæг, профессионалон хъазæг нæу. Шахматтæм æрбацыд азы размæ онлайн фæзуаттыл хъазгæйæ. Æртыккаг бынатыл та ацыд 13-аздзыд Джыгкайты Артур", - загъта Саулохты Георгий.
Ерысты æдæппæт хайад райстой 30 фæлтæрд хъазæджы.
"Чызджыты æхсæн иууыл хуыздæр фæстиуæг ис Тыбылты Аланайæн. 10 азы онг кары категорийы фыццаг бынатыл ацыд Дудайты Михаил, 12 азы онг – Мæлдзыгаты Хасан, 15 азы онг – Мæргъиты Давид", - загъта федерацийы президент.