ЦХИНВАЛ, 26 ноя – Sputnik. Хуссар Ирыстоны спортсментæ рамбылдтой 15 майданы Дзæуджыхъæуы ацæуæг турниры рог атлетикæйæ. Уый тыххæй фехъусын кодта фæсивæдон политикæ æмæ спорты комитеты пресс-службæ. Сывæллæттæн сæ фылдæр фыццаг хатт бацархайдтой республикæйы æдде ерысты. Се `хсæн уыдысты бынтон æрыгæттæ дæр – 2015-2016 азы гуырд спортсментæ.
Хуссар æмæ Цæгат Ирыстоны атлеттæй дарддæр ма турниры уыдысты Кæсæг-Балхъары минæвæрттæ.
Сызгъæрин майдантæ рамбылдтой: Наниты Давид, Багаты Артур, Джиоты Марат, Бекъойты Александра, Коцты Анастасия, Гæззаты Мария æмæ Бестауты Алим;
Æвзист хорзæхтæ райстой: Джиоты Александр, Коцты Анастасия, Тыджыты Аланæ æмæ Джиоты Марат;
Пьедесталы æртыккаг къæпхæнмæ схызтысты: Гæззаты Любовь, Гæззаты Лиза æмæ Тыджыты Аланæ.
Бацæттæ сæ кодтой тренертæ Дыгъуызты Алан, Гæззаты Аслан æмæ Санахъоты Мадинæ.
Турнир "Кубок памяти"-йæ ссардтой сæрмагонд æфсæддон операцийы архайæг, Хъæбатырдзинады Ордены кавалер (фæсмæлæт), рог атлетикæйæ олимпаг резервы скъолайы рауагъдон Игорь Бобылевы ном.