ЦХИНВАЛ, 29 ноя — Sputnik, Плиты Фатимæ. Хуссар Ирыстоны Ленингоры районы аиуварс кодтой, фæндагон бастдзинад чи бакъуылымпы кодта æмæ электрохызæгтæ чи бахъыгдардта, уыцы тыхджын митуарды фæстиуджытæ. Уый тыххæй Sputnik-æн фехъусын кодта районы администрацийы сæргълæууæг Уалыты Муртаз.
Йæ ныхæстæм гæгсæ, Ленингорæй Цхинвалмæ æмæ Цъинагарæй Цхинвалмæ фæндагыл транспортæн зынтæй уыд ацæуæн. Миты бæрзæнд хæццæ кодта 50 сантиметрмæ. Фæндæгтæ асыгъдæг кæныныл архайдта районы цæрæн-коммуналон хæдзарады сæрмагонд техникæ иууылдæр, афтæ ма фæндæгты арæзтады комитеты митхафæн техникæ.
Миты аххосæй цалдæр хъæуы бахъыгдард сты электрон хæххытæ дæр. Энергоресурсы кусджытæ цыбыр рæстæгмæ аиуварс кодтой уыцы проблемæ.