ЦХИНВАЛ, 2 дек – Sputnik, Дзæгъиаты Олег. Ирон æвзаджы райрæзт хъуамæ уа æппæт Ирыстоны адæмы сæйраг хæс, фехъусын кодта ирон адæмы XI уанелы рæстæджы "Аланты Ныхас"-ы хуссарирыстойнаг хайады сæргълæууæг, Хуссар Ирыстоны раздæры президент Тыбылты Леонид.
Æппæтдунеон æхсæнадон змæлд "Иры Стыр Ныхас"-ы XI уанел ацыд хуыцаубоны Дзæуджыхъæуы, хайад дзы райстой 400 делегаты бæрц Уæрæсе, Хуссар Ирыстон æмæ æндæр бæстæтæй.
"Хъæуы басæттын, ирон æвзаджы уавæр куыд Цæгат, афтæ Хуссар Ирыстоны дæр ивы æвзæрырдæм. Мах хъуамæ алцыдæр саразæм, цæмæй бавæрæм ирон æвзаг. Ахсджиаг у, цæмæй ирон æвзагыл дзурой æрмæст цардуагон æмвæзадыл нæ, фæлæ ма паддзахадон æмвæзадыл дæр", - загъта Тыбылты Леонид.
Знон æппæтдунеон æхсæнадон змæлд "Иры Стыр Ныхас"-ы ном раивтой "Аланты Ныхас"-мæ. Афтæ ма координацион совет равзæрста организацийы ног сæргълæууæгæй Фриаты Хъазбеджы.