ЦХИНВАЛ, 11 дек - Sputnik. Дзауы поселочы эвакуаци скодтой бирӕфатерон хӕдзары цӕрджыты газ кӕй ахъуыззыд, уый тыххӕй, фехъусын кодта Хуссар Ирыстоны мидхъуыддӕгты министрады (МХМ) пресс-службӕ.
Уагдоны куыд банысан кодтой, афтӕмӕй районы мидхъуыддӕгты хайадмӕ ӕртыццӕджы ӕрбацыд хъусинаг, поселочы бирӕфатерон хӕдзары цур кӕй ис газы смаг. Уырдӕм бацыд фадыгон Нартыхъты Константин, фӕдзырдта газы службӕмӕ ӕмӕ райдыдта хӕдзары цӕрджыты эвакуаци.
"Цауы бынатмӕ ӕрцыд газы службӕйы кусӕг Козаты Вадим ӕмӕ сбӕрӕг кодта, газ кӕй ахъуыззыд къӕбицы газы плитӕйӕ ӕмӕ ӕвӕстиатӕй аиуварс кодта проблемӕ", - радзырдтой министрады.
Уагдоны ӕрсидтысты цӕрджытӕм, цӕмӕй газы смаг куы рахатой кӕнӕ газы ифтонггарз куы фехӕла, уӕд ӕвӕстиатӕй бадзурой аварион службӕмӕ.