ЦХИНВАЛ, 12 дек - Sputnik. Ирон адӕмӕн мадӕлон ӕвзаг у иууыл зынаргъдӕр хӕзна, бахахх кодта Хуссар Ирыстоны президент Гаглойты Алан йӕ арфӕйы ныхасы литературон преми "Булӕмӕргъ" дӕттыны цытджын церемонийы хайадисджытӕн.
Паддзахады сӕргълӕууӕджы номӕй арфӕйы ныхас бакаст республикӕйы фӕсарӕйнаг хъуыддӕгты министр Джиоты Ӕхсар.
"Ирон æвзаг дунейы рагондæр æмæ рæсугъддæр æвзæгты фарсмæ сæрыстырæй лæууы. "Булæмæргъ" егъау ахъаз у, мадæлон æвзагыл чи фыссы, уыцы курдиатджын фæсивæдæн. Уый тынг ахсджиаг у ирон æвзаг æмæ литературæйы райрæзтæн, уымæн æмæ преми разæнгард кæны курдиатджын адæмы ирон æвзагыл фыссын, ирон æвзагыл фæлдисын, æмæ афтæмæй ирон æвзаг размæ кæнын. Цалдæр азы размæ йын фæзынд номинаци уырыссаг æвзагыл фыст уацмысты тыххæй дæр. Афтæмæй ацы преми, йæ организатортæ, йæ жюри адæмы æнгомдæр кæнынц, уарзын сын кæнынц кæрæдзи", - дзырдӕуы президенты арфӕйы ныхасы.
Церемонийы хайадисджытӕн раарфӕ кодта Цӕгат Ирыстоны сӕргълӕууӕг Сергей Меняйло дӕр – йӕ арфӕйы ныхас бакаст республикӕйы хицауады сӕрдары хӕдивӕг, РЦИ-Аланийы ӕххӕстбарджын минӕвар Уӕрӕсейы президенты цур Игорь Барсков.