ЦХИНВАЛ, 28 дек – Sputnik, Дзæгъиаты Олег. Таможнæйон пункт "Дæллаг Зæрæмæг"-ы реконструкци райдайдзæн 2025 азы фыццаг кварталы, фехъусын кодта Хуссар Ирыстоны президент Гаглойты Алан йæ хатдзæгон пресс-конференцийы рæстæджы.
"Проект ныридæгæн рацыд экспертизæ. 2025 азы фыццаг кварталы цы реконструкци райдайа, уый фæстæ уадзæн пункты фæндагон тагтæ фæфылдæр уыдзысты цыппар хатты. Дыууæ азмæ таможнæйы пробкæты проблемæ хъуамæ лыг æрцæуа", - загъта президент.
Гаглойты Алан бафтыдта, зæгъгæ, тагъд рæстæджы "Дæллаг Зæрæмæг"-ы кусджыты штатон нымæц фæфылдæр уыдзæн 36 адæймаджы бæрц, уый та фæтагъддæр кæндзæн аскъуыддзаг кæнын таможнæйы пробкæты проблемæ.