ЦХИНВАЛ, 28 дек – Sputnik, Козаты Диана. Хуссар Ирыстоны реализаци цӕуы цалдӕр ирнвестпроекты, уыдонӕн сӕ бон у ракӕнын экономикӕ ног ӕмвӕзадмӕ, загъта йӕ хатдзӕгон пресс-конференцийы рӕстӕджы президент Гаглойты Алан.
Йӕ ныхӕстӕм гӕсгӕ, дзырд цӕуы дурты заводыл, базальты заводы рауагъдады хъомыс фӕфылдӕр кӕныныл, хъӕды куыстуат, бӕгӕныйы завод ӕмӕ консервон заводы райрӕзтыл.
"Ацы проектты ӕнтыстджын реализацийы руаджы нӕ экономикӕ схиздзӕн ног ӕмвӕзадмӕ, фӕзындзӕн фылдӕр куысты бынӕттӕ", - загъта Гаглойты Алан.
Гаглойты Алан
© Sputnik
Президент бахахх кодта, зӕгъгӕ, хорз перспективӕтӕ ис дуртыл кусыны завод "Импульс-М"-ӕн. Ацы куыстуаты астӕуккаг мызд у 49 мин сомы.
"Куыстуаты ныридӕгӕн ӕрнывыл кодтой кадртӕ цӕттӕ кӕныны системӕ, уыдонӕй иу хай ахуыр кӕнынц бынаты, аннӕты арвитынц Уӕрӕсейы горӕттӕм, цы ран рацӕуынц стажировкӕ. Уагъд цӕуы баныхас фӕсарӕйнаг базартимӕ, цӕмӕй сӕм ласӕм нӕ продукци", - банысан кодта Гаглойты Алан.
Уымӕй дарддӕр президент бафтыдта, зӕгъгӕ, ног куысты бынӕттӕ фӕзындысты хуыйӕн фабрикӕ БТК-4-йы, цы ран уый размӕ фӕкъаддӕр кодтой рауагъдад, фӕлӕ баныхасы фӕстӕ куыстуаты бакодтой ноджы 100 бынаты.