ЦХИНВАЛ, 21 янв – Sputnik, Плиты Фатимӕ. Хуссар Ирыстоны 40 ӕмбӕстаджы бӕрц райсдзысты уӕрӕсейаг фиддонтӕ Стыр Фыдыбӕстӕйон хӕсты Уӕлахизы 80 азы юбилейы цытӕн. Уый тыххӕй Sputnik-ӕн фехъусын кодта республикӕйы ветеранты Советы сӕрдар Хуыбылты Руслан.
"Махмӕ регистраци сты 23 ветераны ӕмӕ Стыр Фыдыбӕстӕйон хӕсты хайадисджыты 16 идӕдзы. Уыдонмӕ ӕмбӕлы фиддонтӕ. Фӕлӕ нырма нӕдӕр хицауад, нӕдӕр Уӕрӕсейы минӕварад нӕ бадзырдтой махмӕ номхыгъдты фӕдыл", - загъта Хуыбылты Руслан.
Советы сӕрдар банысан кодта, ахӕм иухаттон фиддонтӕ кӕй фыстой фондз азы размӕ, уӕлахизы 75 азы юбилеймӕ. Фӕлӕ уӕд дӕр ӕппӕт ветерантӕ нӕ райстой ӕхцатӕ.
"Фӕстаг хатт фиддонтӕ райстой хӕсты рӕстӕджы хорзӕхджын чи ‘рцыд, уыцы ветерантӕ", - банысан кодта Хуыбылты Руслан.