ЦХИНВАЛ, 20 фев – Sputnik, Томайты Аманда. Хуссар Ирыстоны апрелы ацæудзæн уырыссаг культурæйы XIII Республикон фестиваль "Мæ уарзон Уæрæсе". Уæрæсейаг æмбæстæгты координацион советы сæргълæууæг Наталья Жуйкова куыд фехъусын кодта Sputnik-æн, афтæмæй ацы фестиваль ныридæгæн ссис традицон, æмæ йæ ауадзынц æрвылаз.
"Мах æрвылаз уадзæм ацы фестиваль. Ацы аз мадзал нывонд у Уæлахизы 80 азы юбилейæн, уый фæдыл æххæстгæнджытæ хъуамæ бацæттæ кæной ацы нысаниуæгджын цауæн нывонд зарджытæ æмæ æмдзæвгæтæ" - банысан кодта Жуйкова.
Хайадисты фæдыл куырдиæтты райст ныридæгæн райдыдта æмæ адарддæр уыдзæн 20 марты онг.
Фестиваль ацæудзæн Цхинвалы Уырыссаг хæдзар æмæ компани "Мегафон"-ы æххуысæй. Фестивалы уæлахиздзаутæн уыдзæн фадат хайад райсын проект "Здравствуй, Россия!"-йы.