ЦХИНВАЛ, 27 фев – Sputnik, Дзæгъиаты Олег. Хуссар Ирыстоны Национ пантеоны ацыд зындгонд фыссæг, академик Джуссойты Нафийы цыртмæ дидинтæ сæвæрыны церемони. Мадзал нывонд уыд номдзыд ахуыргонды 100 азы юбилейæн.
Джуссойты Нафийы рухс ном ссарынмæ æрбацыд Хуссар Ирыстоны къухдариуæгад президент Гаглойты Аланы сæргълæудæй, хицауады уæнгтæ, парламенты депутаттæ, республикæйы интеллигенци æмæ æхсæнады минæвæрттæ.
Хуссар Иры ссардтой Джуссойты Нафийы рухс ном
© Sputnik / Михаил Авагимов
Хуссар Ирыстоны Зонад-иртасæн институты директор Гаглойты Роберт загъта журналисттæн, Нафи кæй ныууагъта егъау фæд Ирыстон æмæ æппæт Кавказы историйы.
"Нафи ныууагъта егъау фæд Ирыстон æмæ Кавказы историйы куыд ахуыргонд, фыссæг æмæ поэт. Мæн фæнды, цæмæй Ирыстоны фылдæр уа ахæм адæм. Нафийы ном хъуамæ макуы уа рох", - бахахх кодта Гаглойты Роберт.
Номдзыд ирон ахуыргонд Джуссойты Нафийыл ацы цыппæрæмы сæххæст уыдаид 100 азы.