ЦХИНВАЛ, 3 мар – Sputnik, Козаты Диана. Тугъанты Махарбеджы номыл аивадон ахуыргӕнӕндоны директоры хӕстӕ рӕстӕгмӕ ӕххӕст кӕндзӕн Цоциты Бэлла. Хуссар Ирыстоны культурӕйы министр Зӕгъойты Рада къуырисӕры фембӕлд уагдоны коллективимӕ.
Раздӕры директор Зассеты Сӕрмӕт ахицӕн йӕ цардӕй ивгъуыд къуыри.
"Зассеты Сӕрмӕт афтӕ хорз ӕххӕст кодта йӕ хӕстӕ, ӕмӕ хъуыды дӕр никӕмӕ фӕзынд, кӕй йӕ хъӕудзӕн раивын. Ӕцӕг мастер, хорз хъомылгӕнӕг ӕмӕ разамонӕг – кӕй зӕгъын ӕй хъӕуы, ныртӕккӕ зын у хъуыды кӕнын, чи акӕндзӕн йӕ фӕстӕ коллективы, ууыл", - загъта министр.
Фӕлӕ, министры ныхӕстӕм гӕсгӕ, нӕй гӕнӕн бауадзын, цӕмӕй аивадон ахуыргӕнӕндонӕн фӕзына зындзинӕдтӕ къухдариуӕггӕнӕг йын кӕй нӕй, уый тыххӕй.
"Уый фӕдыл абонӕй культурӕйы министры барамындӕй ахуыргӕнӕндоны директоры хӕстӕ рӕстӕгмӕ ӕххӕст кӕндзӕн Цоциты Бэлла. Ног директоры снысан кӕнын фӕдыл скъуыддзаг райсдзыстӕм фӕстӕдӕр, Сӕрмӕты зианы дыууиссӕдзӕм бон куы рацӕуа, уӕд", - загъта Зӕгъойты Рада.
РХИ культурӕйы министр снысан кодта Цоциты Бэллайы аивадон ахуыргӕнӕндоны директоры х.ӕ.
© Photo : Пресс-служба Минкультуры РЮО