ЦХИНВАЛ, 4 мар – Sputnik, Дзӕгъиаты Олег. Хуссар Ирыстон ӕмӕ Никарагуа 27 февралы Мӕскуыйы фембӕлды рӕстӕджы бафыстой ӕхсӕнхицауадон бадзырд. Ацы документмӕ гӕсгӕ дыууӕ бӕстӕйы ӕхсӕн нал уыдзӕн визон формалондзинӕдтӕ дипломатон, официалон, службӕйон ӕмӕ фӕсарӕйнаг паспортты хицӕуттӕн. Республикӕйы Фӕсарӕйнаг хъуыддӕгты министрады (ФХМ) разамонӕг Джиоты Ӕхсар радзырдта Sputnik-ӕн, ацы документы бафыст кӕй у радон къахдзӕф дыууӕ бӕстӕйы ӕхсӕн бадзырдон-барадон базӕйы райрӕзтмӕ.
"Ацы документыл куыст райдыдта ивгъуыд аз. Бадзырд ӕрмӕст дипломаттӕм нӕ хауы, фӕлӕ ма фӕсарӕйнаг паспорттӕ кӕмӕн ис, уыцы ӕмбӕстӕгтӕм дӕр. Хъӕуы ма банысан кӕнын, ацы здӕхты фыццаг къахдзӕф кӕй сарӕзтӕуыд 2010 азы, уӕд бафыстам аналогион документ", - загъта министр.
Джиоты Ӕхсары ныхӕстӕм гӕсгӕ, Никарагуа Хуссар Ирыстонӕн у сӕйраг хӕларадон бӕстӕтӕй иу Латинаг Америкӕйы.
Министр бафтыдта, зӕгъгӕ, аналогион бадзырд Хуссар Ирыстон фӕнд кӕны бафыссын Венесуэлаимӕ дӕр.