ЦХИНВАЛ, 11 мар – Sputnik, Дзӕгъиаты Олег. Ирон богал Багаты Арслан рамбылдта бронзӕйон майдан Европӕйы чемпионаты уӕгъдибар хъӕбысхӕстӕй 24 азы онг кары спортсменты ӕхсӕн Тиранайы (Албани).
Багаты Арслан ацыд ӕртыккаг бынатыл 86 килограммы уӕзы категорийы. Арслан ныддӕрӕн кодта йӕ ныхмӕлӕуджыты ӕрдӕгфиналмӕ фӕндагыл 32:0 иумӕйаг хыгъдӕй. Фӕлӕ ӕрдӕгфиналы ирон хъӕбысӕйхӕцӕг фембылд Рахим Магамадовӕн. Бронзӕйон майданыл тохы ирон богал рамбылдта туркаг спортсмен Алперен Атарайы 7:4 хыгъдӕй.
Ирон хъӕбысӕйхӕцӕгӕн ацы майдан у дыккаг Европӕйы чемпионатты уӕгъдибар хъӕбысхӕстӕй 24 азы онг кары спортсменты ӕхсӕн. Фарон Арслан ссис турниры уӕлахиздзау Бакуйы.