ЦХИНВАЛ, 11 мар – Sputnik, Дзӕгъиаты Олег. Хуссарирыстойнаг спортсмен Джиоты Арсений рамбылдта сыгъзӕрин майдан Европӕйы чемпионаты уӕгъдибар хъӕбысхӕстӕй 24 азы онг кары спортсменты ӕхсӕн Тиранайы (Албани).
Джиоты Арсений ӕхсӕнадӕмон аренӕйы хъахъхъӕны Азербайджаны спортивон кад, ӕмӕ турниры архайдта 86 килограммы уӕзы категорийы.
Финалы 1/8 хайы Арсений ӕнцонтӕй рамбылдта Размик Епремены Сомихстонӕй 10:0 хыгъдӕй. Финалы цыппӕрӕм хай ӕмӕ ӕрдӕгфиналы ирон спортсменӕн уыд зындӕр – уый рамбылдта Евгений Михалчаны (Молдова) ӕмӕ Радомир Стояновы (Болгари) 6:4 ӕмӕ 4:2 хыгъдтӕй.
Финалы Джиоты Арсений фембӕлд Рахим Магамадовимӕ (Франци), уый ӕрдӕгфиналы рамбылдта Ирыстоны минӕвар Багаты Арсланы. Фӕлӕ Магамадовӕн нӕ бантыст дыууӕ бонмӕ рамбулын дыккаг ирон спортсмены, Арсений фӕуӕлахиз 9:2 хыгъдӕй.
Джиоты Арсенийӕн ацы майдан у дыккаг Европӕйы чемпионаттты уӕгъдибар хъӕбысхӕстӕй 24 азы онг кары спортсменты ӕхсӕн. Фарон та Бакуйы Арсений рамбылдта бронзӕйон майдан.