ЦХИНВАЛ, 24 мар — Sputnik, Плиты Фатимæ. Республикон паддзахадон унитарон куыстуат Хуссар Ирыстоны "Автомобилон транспорты фæткдаруат" ацы аз фæнд кæны бакæнын æхсæнадæмон автобусон рейстæ. Уагдоны разамонæг Уалыты Сергей радзырдта Sputnik-æн, кæй фæнд кæнынц бакæнын комкоммæ транспортон бастдзинад Мæскуы, Сухум æмæ Хъырымимæ.
"Ныртæккæ нæм нæй æнæмæнгхъæугæ къласы автобустæ ахæм рейстæн. Фæлæ республикæйы хицауад кусы ацы фарстыл, æмæ нæ ныфс ис, тагъд рæстæджы кæй бакæндзыстæм автобусон бастдзинад Хъырым æмæ Мæскуыимæ, сæрдыгон период та Сухумимæ", - банысан кодта Уалыты Сергей.
Йæ ныхæстæм гæсгæ, билеттæ уæй кæндзысты развæлгъау заказтæм гæсгæ.