ЦХИНВАЛ, 8 апр — Sputnik, Плиты Фатимӕ. Хуссар Ирыстоны Знауыры районы сбӕрӕг кодтой Къӕбысты Зурабы номарӕн турниры тыхджындӕр командӕ дзюдойӕ.
Знауыры районы дзюдойы скъолайы бындурӕвӕрӕг ӕмӕ Хуссар Ирыстоны дзюдойы Федерацийы президент Гӕбӕраты Инал радзырдта Sputnik-ӕн, турниры майдантыл кӕй тох кодтой цыппар командӕйы Хуссар ӕмӕ Цӕгат Ирыстонӕй.
Цымыдисон ӕмӕ ирд тохты фӕстиуӕгӕн уӕлахиздзау ссис Знауыры районы командӕ. Дыккаг бынатыл ацыд Цӕгат Ирыстоны Михайловское поселочы командӕ. Цхинвал ӕмӕ Дзауы ӕмӕ Ленингоры иумӕйаг командӕ та адих кодтой ӕртыккаг бынат.
Гӕбӕраты Иналы ныхӕстӕм гӕсгӕ, ерыстӕ уыдысты ӕцӕг бӕрӕгбон спорт уарзджытӕн – спортсменты тохтӕ бакӕсынмӕ ӕрбацыд бирӕ адӕм.
Гӕбӕраты Инал ма радзырдта, ацы турнир уагъд кӕй цӕуы ӕртыккаг хатт.
"Знауыры районы дзюдойы скъола 2005 азы арӕзт куы ӕрцыд, уӕдӕй фӕстӕмӕ Къӕбысты Зураб цалынмӕ удӕгас уыд, уӕдмӕ ӕххуыс кодта спортсментӕн. Уый цин кодта йӕ Райгуырӕн бӕстӕйы рӕзт ӕмӕ ӕнтыстытыл", - загъта Гӕбӕраты Инал.
Знауыры дзюдойы скъола йӕ сырӕзтӕй фӕстӕмӕ рауагъта бирӕнымӕц спорты мастертӕ ӕмӕ тренерты.