ЦХИНВАЛ, 15 апр — Sputnik, Плиты Фатимæ. Хуссар Ирыстоны апрелы радайæны тынг уазал кæй вæййы, уый фæдыл ис тас тыллæджы фидæнæн.
Хуссар Ирыстоны ивгъуыд къуыри уыд тынг уазал уалдзæджы æмбисæн. Республикæйы районты температурæ æрхаудта -7 градусы онг.
"Махмæ температурæ æрхаудта -5 градусы онг, ноджы ма мит дæр æруарыд. Зиан æнæмæнг æрхæсдзæн, фæлæ йæ масштабтæ бæрæг уыдзысты æрмæстдæр цалдæр боны фæстæ", - радзырдта Sputnik-æн Знауыры районы Хъорнисы хъæуы цæрæг Батрадз.
Йæ ныхæстæм гæсгæ, зианы гуырахст дырысæй бæрæг уыдзæн, боныгъæд куы фæхуыздæр уа, уæд.
Ирдгæтæй зиан баййæфтой æрмæст районтæ нæ, фæлæ Цхинвал дæр.
"Нырма зын зæгъæн у, цы зиан нын æрхаста. Цахæм контраст уыд райсомæй: рахызтæн дыргъдонмæ, бæлæстæ æфтауынц, боцкъайы та дон – салд", - радзырдта Цхинвалы цæрæг Михаил.
Уазæлттæ иттæг тæссаг сты дидин чи æфтауы, уыцы бæлæстæн, куыд кæрдо, чылауи, æхчынцъы æмæ æндæртæ.