ЦХИНВАЛ, 23 апр – Sputnik. Козаты Дианæ. Ленингоры Чысаны ерыстауты галуаны уавæрæн саргъ кæндзысты Росгосэкспертизæйы кусджытæ. Специалисттæ Хуссар Ирыстонмæ æрцæуынвæнд кæй кæнынц, уый тыххæй Sputnik-æн фехъусын кодта культурæйы министр Зæгъойты Рада.
Йæ ныхæстæм гæсгæ, ахæм фадат фæзынд Уæрæсейы культурæйы министр Ольга Любимоваимæ бадзырды руаджы.
"Æрцæудзысты нæм, культурон бынтæ хъахъхъæныны къабазы æмбæлгæ квалификаци кæмæ ис, ахæм специалисттæ. Сæ хæс у музейы ныры уавæрæн саргъ кæнын æмæ йæ реставрацийæн – кæнæ, чи зоны, иуæй-иу хæйтты консервацийæн – чи хъæуы, уыцы мадзæлттæ снысан кæнын", – бамбарын кодта Зæгъойты Рада.
Йæ ныхæстæм бафтыдта уый дæр, æмæ Хуссар Ирыстоны культурæйы министрад бацагуырдта, сæрмагондæй кавказаг архитектурæимæ хорз зонгæ чи у, ахæм адæмы.
Чысаны ерыстауты музей у Хуссар Ирыстоны историон-культурон цыртдзæвæн. Амад æрцыд 1600 азмæ ’ввахс, рацарæзтой йæ 1729 азы. Ныртæккæ дзы ис бæстæзонæн музей.