ЦХИНВАЛ, 6 июн – Sputnik, Дзӕгъиаты Олег. Хуссар Ирыстоны банысан кодтой номдзыд уырыссаг поэт ӕмӕ фыссӕг Александр Пушкины райгуырдыл 226 азы сӕххӕсты цытӕн Уырыссаг ӕвзаджы бон (Пушкины бон).
Цхинвалы Пушкины скверы бӕрӕгбонон мадзалмӕ ӕрбацыдысты Хуссар Ирыстоны ахуырады министр Лолаты Аслан, Уӕрӕсейы минӕварады уынаффӕгӕнӕг-минӕвар Хуссар Ирыстоны Денис Федоров, Уырыссаг хӕдзары сӕргълӕууӕг Сергей Комиссаров, ӕхсӕнад ӕмӕ интеллигенцийы минӕвӕрттӕ, столицӕйы съолаты ахуырдзаутӕ ӕмӕ ХИПУ-йы студенттӕ.
Уӕрӕсейы минӕварады уынаффӕгӕнӕг-минӕвар Хуссар Ирыстоны Денис Федоров раарфӕ кодта ӕрӕмбырдуӕвджытӕн ацы бӕрӕгбоны цытӕн ӕмӕ банысан кодта, уырыссаг ӕвзаг популярон кӕй у дунейы.
Россотрудничествойы минӕварады разамонӕг Сергей Комиссаров йӕхирдыгӕй бахахх кодта, Александр Пушкин кӕй бахаста егъау хайбавӕрд уырыссаг ӕвзаг ӕмӕ литературӕйы рӕзтмӕ.
Комиссаров ма бафтыдта, Хуссар Ирыстон кӕй у уырыссаг дуне ӕмӕ уырыссаг ӕвзаджы цӕджындз Хуссар Кавказы.
Мадзалы рӕстӕджы скъоладзаутӕ ӕмӕ студенттӕ бакастысты Александр Пушкины уацмыстӕ.