ЦХИНВАЛ, 18 сен – Sputnik, Плиты Фатимӕ. Хуссар Ирыстоны фыццаг ӕхсӕнадӕмон экономикон форум "Южная Осетия. Горизонты инвестиций" у ахсджиаг къахдзӕф республикӕйы экономикӕ сӕндидзын кӕнынӕн. Уый тыххӕй фехъусын кодта Уӕрӕсейы сӕудӕджерад ӕмӕ амалиуӕггӕнджыты цӕдисы президент, Националон иртасӕн институт "Высшая школа экономики"-йы сӕргълӕууӕг Александр Шохин йӕ ралӕуды рӕстӕджы форумы.
"Абоны экспозици ӕмӕ панелон дискусситӕ ӕвдисынц, ӕрмӕст юбилейон мадзал кӕй нӕу. Республикӕ хизы динамикон райрӕзты ног этапмӕ – инновацитӕ ӕмӕ ног технологиты бындурыл", - бахахх кодта Шохин.
Йӕ ныхӕстӕм гӕсгӕ, Хуссар Ирыстонӕн ис уникалон шанс аразын экономикӕ инновацион ӕмӕ цифрон базӕйыл, пайда кӕнын аразгӕ интеллектӕй.
Александр Шохин уӕлдай хъусдард аздӕхта кадрты цӕттӕкӕнынадмӕ.
"Мах Уӕрӕсейы фӕнды, цӕмӕй арӕзт цӕуой компетенцитӕ ӕвзонг фӕлтӕрӕн ӕмӕ цӕттӕ стӕм кусын республикӕимӕ кусджытӕ, инженертӕ ӕмӕ специалистты ног классы арӕзтадыл. Уыцы кусджытӕн фадат уыдзӕн дистанцион ӕгъдауӕй ӕххӕст кӕнын ӕмгуыстад егъау уӕрӕсейаг компанитимӕ. Фӕлӕ сӕйраг у саразын куысты бынӕттӕ республикӕйы мидӕг", - бахахх кодта Шохин.
Цхинвалы 18-20 сентябры цӕуы фыццаг ӕхсӕнадӕмон форум форум "Южная Осетия. Горизонты инвестиций".