ЦХИНВАЛ, 15 окт — Sputnik, Плиты Фатимӕ. Хуссар Ирыстоны президент Гаглойты Алан бабӕрӕг кодта Республикон бирӕпрофилон медицинон центр.
Паддзахады сӕргълӕууӕг бацыд операцион ӕмӕ диагностикон хайадтӕм, ӕрныхас кодта дохтыртимӕ, инженерон-техникон специалисттимӕ ӕмӕ пациенттимӕ.
"Уӕрӕсейы президент Владимир Путины барамындӕй егъау ӕххуыс бакодтой Хуссар Ирыстоны медицинӕйы къабазӕн. Ног ифтонггарзы руаджы фенцондӕр уыдзӕн пациенттӕн хос кӕнын", - банысан кодта президент.
Хуссар Ирыстоны ӕнӕниздзинад хъахъхъӕнынады министр Наниты Сослан фехъусын кодта, уӕрӕсейаг специалисттӕ кӕй фӕуд кӕнынц ног ифтонггарзы ӕвӕрд. Ӕмрӕстӕджы райдыдта егъау куыст медицинон техникӕйы 207 иуӕджы сцалцӕг кӕныны фӕдыл.
Министр ма радзырдта ног программӕты тыххӕй, кӕцыты райдайдзысты реализаци кӕнын Хуссар Ирыстоны Уӕрӕсейы ӕххуысӕй. Сӕ нымӕцы – республикӕйы цӕрджыты диспансеризаци уӕрӕсейаг специалистты хайадистӕй.
Президент Гаглойты Алан бахахх кодта, Уӕрӕсейы Федерацийы ӕххуысы фӕрцы Хуссар Ирыстоны медицинӕ размӕ къахдзӕф кӕй сараздзӕн.
"Абоны бон мах уынӕм Уӕрӕсеуы ӕххуысы хатдзӕгтӕ. Ӕмбӕстӕгты ӕнӕниздзинад у нӕ сӕйраг приоритет", - загъта паддзахады сӕргълӕууӕг.