ЦХИНВАЛ, 17 окт – Sputnik, Козаты Диана. Хуссар Ирыстоны социалон-экономикон райрӕзты паддзахадон программӕ ӕмӕ Инвестпрограммӕйыл республикӕйы адӕм ӕвӕрынц стыр ныфсытӕ, цӕмӕй сӕ цард хуыздӕрырдӕм фӕива, фехъусын кодта президент Гаглойты Алан кусӕгон рабадты рӕстӕджы Уӕрӕсе ӕмӕ Хуссар Ирыстоны ӕхсӕн социалон-экономикон ӕмгуыстады фарстыты фӕдыл.
Республикӕмӕ кусӕгон балцы ӕрцыд Уӕрӕсейы экономикон райрӕзты министрад ӕмӕ АО "Кавказ.РФ"-ы делегаци экономикон райрӕзты министры хӕдивӕг Сергей Назаровы сӕргълӕудӕй.
"Республикӕйы къухдариуӕгад ӕмӕ адӕм, кӕй зӕгъын ӕй хъӕуы, ӕнхъӕлмӕ кӕсынц хорзырдӕм ивындзинӕдтӕм ацы программӕты руаджы. Уыдон сты гъӕдджын медицинӕ, фӕндӕгтӕ, мыздты фӕфылдӕр, ног куысты бынӕттӕ, инвесторты ӕрбаздахт ӕмӕ афтӕ дарддӕр", - загъта Гаглойты Алан.
Президент бахахх кодта, зӕгъгӕ, республикӕйы ӕмбаргӕ ахаст дарынц ныры уавӕрмӕ сӕрмагонд ӕфсӕддон операци хынцгӕйӕ. Фӕлӕ уыимӕ иумӕ Хуссар Ирыстоны къухдариуӕгад алцыдӕр хъуамӕ араза, цӕмӕй фӕфылдӕр уа адӕмы царды ӕмвӕзад.
Уӕрӕсейы экономикон райрӕзты министры хӕдивӕг Сергей Назаров банысан кодта, уӕрӕсейаг коллегӕтӕ лӕмбынӕг куыст кӕй бакодтой хицауадимӕ проограммӕйы алы здӕхтыл дӕр ӕмӕ ныр дӕр цӕттӕ сты ӕркӕсын уӕлӕмхас ӕххуысы фарстытӕм.
Йӕ ныхӕстӕм гӕсгӕ, ныртӕккӕ сӕйраг хӕс у ӕрбаздахын бизнес, уыцы нысан уыд фыццаг ӕхсӕнадӕмон экономикон форумӕн дӕр.