ЦХИНВАЛ, 27 окт – Sputnik, Дзæгъиаты Олег. Хуссар Ирыстоны генералон прокурор Собаты Григорий радзырдта республикæйы президент Гаглойты Аланæн барадхъахъхъæнæг органты кусджытæ республикæйы дыууæ æмбæстаджы кæй фæнадтой, уый тыххæй.
Цхинвалы дыууæ 19-аздзыд цæрæджы, Плиты Вадим æмæ Кокойты Эдуарды æрурæдтой Милицийы сæрмагонд нысаниуæджы кусджытæ 12 октябры хæдтулгæйыл æнæ номыртæй. Сæ документтæ басгарыны фæстæ уыдоны бакодтой мидхъуыддæгты хайадмæ æмæ сæ уым фæнадтой.
"Нырма цæуы басгæрст, фæлæ мидхъуыддæгты органты къорд кусæджы систой сæ бынæттæй", - фехъусын кодта генпрокурор.
Собаты Григорий бафтыдта, зæгъгæ, зианбаййафæг фарс райгондæй баззад æфхæрдæй æмæ ныридæгæн бадзырдтой прокуратурæмæ, цæмæй æрлæууын кæной фæдæвзарæн сæ куырдиаты фæдыл.