ЦХИНВАЛ, 11 ноя – Sputnik. Цхинвалы райдыдтой асфальт кӕнын уынгтӕ Инвестпрограммӕйы фӕлгӕтты, фехъусын кодтой Хуссар Ирыстоны хицауады пресс-сулжбӕйы.
Галаты Борисы ӕмӕ Дзугаты Георгийы уынгтыл ныридӕгӕн сӕвӕрдтой асфальты фыццаг цъар.
"Аналогион куыст бакодтой Бушы алвӕндагыл дӕр, ныр та бавнӕлдтой Кочысаты Розайы уынг асфальт кӕнынмӕ. Ӕртӕ боны дӕргъы фӕуыдзыстӕм ам куыстытӕ ӕмӕ рахиздзыстӕм Чернышевскийы уынгмӕ Шанхайы микрорайоны", - загъта арӕзтад ӕмӕ архитектурӕйы министр Цоциты Зауыр.
Уымӕй дарддӕр Цхинвалы цыппар уынгыл дарддӕр цӕуынц хӕрзарӕзтадон куыстытӕ. Специалисттӕ цӕттӕ кӕнынц асфальт сӕвӕрынмӕ Уанаты, Маяковскийы, Ӕфсӕнвӕндагон ӕмӕ Шаумяны уынгтӕ.
Куыстытӕ цӕуынц графикмӕ гӕсгӕ. Азы кӕронмӕ ӕдӕппӕт фӕнд кӕнынц сцалцӕг кӕнын фараст уынджы.