ЦХИНВАЛ, 2 дек – Sputnik. Абон информацион агентад "Рес"-ыл сæххæст 30 азы. Уый тыххæй сæ схорзæхджын кодта сын æмæ сын арфæйы ныхæстæ загъта президент Гаглойты Алан. Йæ ныхæстæм гæгсæ, Хуссар Ирыстоны историйы уæззау рæстæджыты "Рес" бахаста стыр æвæрæн информацион блокадæйы сæрты ахизынмæ æмæ дунеон æхсæнадмæ рæстдзинад хæццæ кæныны хъуыддагмæ.
Агентады бындурæвæрæг Харебаты Батрадз хорзæхджын æрцыд "Фæллойы сгуыхтдзинæдты тыххæй" I къæпхæны майданæй. "Рес"-ы ныры разамонæг Харебаты Майяйæн лæвæрд æрцыд ацы майданы II къæпхæн. Уымæй уæлдай авд кусæгæн саккаг кодтой "Республикæ Хуссар Ирыстоныл 35 азы сæххæсты" майдантæ. Уыдон сты Æлборты Александра, Козаты Джульеттæ, Томайты Иринæ, Хъабанты Дианæ, Хуыбиаты Зæринæ, Гæззаты Каринæ æмæ Цхуырбаты Зауыр.