ЦХИНВАЛ, 5 дек — Sputnik. Хуссар Ирыстоны президент Гаглойты Алан бабæрæг кодта Республикон бирæпрофилон медицинон центры дыууæ фæндагон-транспортон цауы фæстиуæгæн буары цæфтæ чи райста, уыцы æмбæстæгты. Президент загъта зианбаййафджыты хиуæттæн, паддзахад сын æнæмæнгхъæугæ æххуыс бакæнынмæ цæттæ кæй у.
Президенты пресс-секретарь Босыкты Наталья фехъусын кодта, цыппæрæмы президент авариты тыххæй информаци куы райста, уæд æрбацыд рынчындонмæ. Уым ын радзырдтой пациентты уавæры тыххæй.
"Уæлдай хъусдард здæхт уыд 18-аздзыд лæппумæ, уый ис тынг уæззау уавæры аварийы фæстæ æмæ йын сарæзтой экстренон операци. Ацы аварийы ма цæфтæ райста ноджы иу пассажир, медиктæ йын йæ уавæрæн саргъ кодтой, куыд стабилон", - банысан кодта Босыкты Наталья.
Уыцы бон ма рынчындонмæ бакодтой сылгоймаджы, кæцыйæн æндæр аварийы фæстиуæгæн ацъæл йæ рагъыстæг. Гаглойты Алан æй бабæрæг кодта æмæ йын загъта, паддзахад йæ фарсмæ кæй ис.