ЦХИНВАЛ, 6 фев – Sputnik, Тедеты Виктория. Цхинвалы спорты галуан "Олимп"-ы ацыд Советон Цӕдисы спорты мастер боксӕй, "Уацамонгӕ"-йы Ордены кавалер Кокойты Дзамболаты номарӕн турнир боксӕй.
Ерысты хайад райстой 2008-2013 азы гуырд ӕвзонг боксертӕ.
Хуссар Ирыстоны фӕсивӕдон политикӕ ӕмӕ спорты фӕдыл комитеты сӕрдар Гасситы Сослан загъта бузныг мадзалы хайадисджытӕ ӕмӕ организатортӕн, афтӕ ма йӕ зӕрдӕ загъта спортсментӕн дарддӕры ӕнтыстытӕ.
"Кокойты Дзамболат ныууагъта стыр фӕд Ирыстоны историйы, махӕн та нӕ хӕс у хъуыды кӕнын ӕмӕ фидӕны фӕлтӕртӕн адӕттын нӕ хъайтарты мысынад", - банысан кодта комитеты разамонӕг.
Турнирмӕ ӕрбацыдысты Кокойты Дзамболаты бинонты уӕнгтӕ: йе ‘мкъай Тедеты Рита, фырт Кокойты Эдуард.
Ерысты уӕлахиздзаутӕ ӕмӕ призерты схорзӕхджын кодтой грамотӕтӕ, майдантӕ ӕмӕ кубоктӕй.