ЦХИНВАЛ, 12 фев – Sputnik, Дзӕгъиаты Олег. Ирон спортсментӕ Байаты Давид, Найфонты Артур ӕмӕ Кцойты Алихан хайад райсдзысты ӕхсӕнадӕмон супертурниры уӕгъдибар хъӕбысхӕстӕй Бишкекы (Киргизи) 13 февралы.
Байаты Давид тох кӕндзӕн 74 кг уӕзы категорийы. Давиды ныхмӕлӕуджытӕ уыдзысты ивгъуыд азы дунейы чемпион Йошиносуке Аояги (Япони), Уӕрӕсейы чемпион, Европӕйы чемпион 24 азы кары онг Иналбек Шериев (Уӕрӕсе) ӕмӕ Азийы чемпионаты бронзӕ призер Орозобек Токтомамбетов (Киргизи).
Найфонты Артур та архайдзӕн турниры 86 кг уӕзы категорийы. Ирон богалы ныхмӕлӕуджытӕ уыдзысты Азийы ӕртӕ хатты чемпион, дунейы чемпионатты дыууӕ хатты бронзӕ призер Азамат Даулетбеков (Казахстан), 2024 азы Панамерикайаг хъӕзтыты уӕлахиздзау Натан Джексон (АИШ) ӕмӕ БРИКС-ы хъӕзтыты уӕлахиздзау Малик Шаваев (Киргизи).
Кцойты Алихан та тох кӕндзӕн 97 кг уӕзы категорийы. Ирон хъӕбысӕйхӕцӕджы ныхмӕлӕуджытӕ уыдзысты 2023 азы дунейы чемпион Ризабек Айтмухан (Казахстан), Европӕ ӕмӕ дунейы чемпионаты призер 24 азы кары онг Мераб Сулеиманишвили (Гуырдзыстон) ӕмӕ 2022 азы дунейы чемпионаты ӕвзист призер Ахмед Батаев (Болгари).