ЦХИНВАЛ, 17 мар – Sputnik, Дзæгъиаты Олег. Хуссар Ирыстоны фæллойад æмæ социалон хъахъхъæнынады министрад ацы къуырийы дæргъы бавдисдзæн республикæйы президент Гаглойты Аланæн хъæппæристæ пенситы индексацийы фæдыл, фехъусын кодта уагдоны сæргълæууæг Гаглойты Олег йæ пресс-конференцийы рæстæджы информаци æмæ мыхуыры комитеты.
Гаглойты Олег бахахх кодта, зæгъгæ, Хуссар Ирыстоны пенситы индексаци гæнæн ис уа иуыл фылдæр республикæйы историйы.
"Раздæр индексацитæ уыдысты 5-6 проценты, иуыл фылдæр та уыд 8 процентæй чысыл фылдæр – уый уыд 2023 азы. Мах бафæлвардзыстæм фæфылдæр кæнын ацы процент, фæлæ, кæй зæгъын æй хъæуы, бирæ баст у нæ республикæйы финансон фадæттимæ. Уый фæдыл дырыс цифрæтæ фехъусын кæнын нæ бон нæу", - банысан кодта министр.