ЦХИНВАЛ, 18 мар – Sputnik, Дзӕгъиаты Олег. Ӕртӕ ирон уӕгъдибар хъӕбысӕйхӕцӕджы хайад райсдзысты Профессионалон хъӕбысхӕсты лигӕйы 11-ӕм турниры.
Ерыстӕ цӕудзысты 27 марты Ташкенты.
Иван Ярыгины Кубокы уӕлахиздзау Тауитты Чермен рахиздзӕн гауызмӕ дунейы чемпионаты ӕвзист призер Омурбек Асан Уулуимӕ. Тох ацӕудзӕн 61 килограммы уӕзы категорийы.
Ирон хъӕбысхӕсты сӕйраг стъалы, олимпиаг чемпион ӕмӕ дунейы ӕртӕ хатты чемпион Сидахъты Зауырбег тох кӕндзӕн 74 килограммы уӕзы категорийы дунейы архайгӕ чемпион Кота Такахашиимӕ.
Хӕдӕрцаты ӕфсымӕрты номарӕн ӕхсӕнадмон турниры дыууӕ хатты уӕлахиздзау Кцойты Алихан фембӕлдзӕн Казахстаны минӕвар, 2023 азы дунейы чемпион Ризабек Айтмуханимӕ 97 килограммы уӕзы категорийы.