ЦХИНВАЛ, 19 мар - Sputnik. Президент Гаглойты Алан саргъ кодта Хуссар Ирыстоны Мидхъуыддæгты министрады (МХМ) куыстæн 2025 азы æмæ æрсидт фæтынгдæр мадзæлттæ кусджыты социалон хъахъхъæнынады фæдыл.
Цхинвалы цыппæрæмы ацыд Мидхъуыддæгты министрады хыгъдлæвæрдон коллеги. Мадзалы рæстæджы банысан кодтой, ивгъуыд аз кæй фæфылдæр фыдракæндты бæрæгкæнынад.
Паддзахады сæргълæууæджы ныхæстæм гæсгæ, ацы бæрæггæнæн равдыста оперативон куысты эффективондзинад.
Президент иуыл тæссагдар æртхъирæнтæй иуыл нымайы наркотикты æнæзакъонон æрзылд. Гаглойты Алан банысан кодта системон куыст ацы здæхты, фæлæ йæ хъæуы фæтынгдæр кæнын.
Президент ма йæ цæст æрдардта министрады кусджыты социалон хъахъхъæнынады фарстытыл. Йæ ныхæстæм гæсгæ, дарддæр цæуы куыст мыздтæ фæфылдæр кæныныл: фыццаг этап ныридæгæн среализаци кодтой.
Паддзахады сæргълæууæг ма æрсидт фæтынгдæр кæнын куыст фæсивæдимæ æмæ фыдракæндты профилактикæйы фæдыл.
"Ацы здæхты хъæуы скъолатæ, бинонтæ, хицауады органтæ æмæ барадхъахъхъæнæг системæйы иумæйаг куыст. Ацы здæхтмæ хъуамæ уа сæрмагонд цæстдард, уымæн æмæ дзырд цæуы нæ бæстæйы сомбоныл", - загъта Гаглойты Алан.
Президент æрдзырдта программæ "Æдас горæт"-ы реализацийыл дæр. Йæ ныхæстæм гæсгæ, программæ хъуамæ куса æххæст бæрцæй, уымæн æмæ æндавы æмбæстæгты æдасдзинадыл.